ജ്യോതിഷത്തിലോ ജ്യോല്‍സ്യന്മാരിലോ യാതൊരു വിശ്വാസവുമില്ലെങ്കിലും അതില്‍ വിശ്വസിക്കുന്നവരെ ഒരു പരിധി വിട്ട്‌ വിമര്‍ശിക്കാന്‍ ഞാന്‍ മുതിരാറില്ല. എന്തായാലും ഇതുവരെ കണ്ടും കേട്ടും ഇരുന്ന ജ്യോല്‍സ്യന്മാരുടെ പ്രവചനങ്ങളും അതനുഭവിച്ച കണ്‍ മുന്നിലെ കുറേ ഉദാഹരണങ്ങളും ഈ ലേഖനത്തിലൂടെ വിശദീകരിച്ച്‌ കൈത്തരിപ്പ്‌ തീര്‍ക്കുക എന്നതാണ്‌ ഉദ്ദേശ്യം.
ജ്യോല്‍സ്യന്മാരുടെ സാമ്പത്തിക ഉന്നമനത്തിനായി പ്രവര്‍ത്തിക്കുന്ന എന്റെ മാതാശ്രീയാണ്‌ ചെറുപ്പം മുതല്‍ എന്റെ മുന്നിലുള്ള ഒരു ഉദാഹരണം. ഈ സാമ്പത്തിക ഉന്നമനം എന്ന് ഉദ്ദേശിച്ചത്‌ ഇടയ്ക്കിടയ്ക്ക്‌ അവരെ സന്ദര്‍ശിച്ച്‌ പല കാര്യങ്ങളുടെയും സമയവും മറ്റും നോക്കിച്ച്‌ അവരുടെ ഫീസ്‌ അടച്ച്‌ അവരെ ധനികരാക്കുക എന്നത്‌ തന്നെ.
തികഞ്ഞ ഒരു കമ്മ്യൂണിസ്റ്റ്‌ കാരനായ പിതാശ്രീ ഇതിനെയെല്ലാം കളിയാക്കുകയും വിമര്‍ശിയ്ക്കുകയും ചെയ്യുന്നതും കണ്ട്‌ ഗുണദോഷങ്ങള്‍ തുലനം ചെയ്യുകയായിരുന്നു ചെറുപ്പകാലം മുതല്‍. ഇതില്‍ നിന്ന് ഒരു കാര്യം മനസ്സിലായി. ഒരു ജ്യോല്‍സ്യന്റെ വാക്കുകളെ വിശ്വസിക്കുന്ന ഒരാള്‍ക്ക്‌ അത്‌ സത്യമാണെന്ന് വരുത്തിത്തീര്‍ക്കാന്‍ വളരെ എളുപ്പമാണ്‌. അത്‌ ശരിയാണ്‌ അല്ലെങ്കില്‍ സത്യമാണ്‌ എന്ന് സ്ഥാപിച്ചെടുക്കേണ്ട ഉത്തരവാദിത്ത്വം വിശ്വാസിയുടേതാണ്‌. ഒരു ജ്യോല്‍സ്യന്‍ തൊട്ടും തൊടാതെയും വല്ലതും പറഞ്ഞാല്‍ അതിന്‌ വേണ്ട ലിങ്കുകള്‍ ഉണ്ടാക്കലും അതില്‍ പല അര്‍ത്ഥങ്ങള്‍ കണ്ടെത്തലും സാദ്ധ്യം തന്നെ.
ശരിയും തെറ്റും തിരിച്ചറിയാറായപ്പോള്‍ ഞാനും മാതാശ്രീയുടെ ജ്യോല്‍സ്യന്മാരെയും ജ്യോതിഷത്തെയും പരിഹസിച്ചുതുടങ്ങി. പക്ഷെ, എനിയ്ക്കൊരു ജീവിതപങ്കാളിയെ കണ്ടുപിടിയ്ക്കാനായി എന്റെ സ്പെസിഫിക്കേഷന്‍സിന്റെ കൂടെ ജാതകവും കൂടി ഉള്‍പ്പെടുത്താനുള്ള ആഗ്രഹത്തെ ഞാന്‍ നിരുത്സാഹപ്പെടുത്തിയില്ല. അത്‌ ഒരു അവകാശമായി മാതാശ്രീയ്ക്ക്‌ അനുവദിച്ചു കൊടുത്തു. (ജാതകവും മറ്റും നോക്കേണ്ട ആവശ്യമില്ലാതെ വല്ല പെണ്‍കുട്ടികളും സ്റ്റോക്ക്‌ ഉണ്ടെങ്കിലല്ലേ പ്രശ്നമുള്ളൂ... പിന്നെ, എന്റെ സ്വഭാവമഹിമകൊണ്ടോ ഗ്ലാമര്‍ കൊണ്ടോ അതോ അവസരരാഹിത്യം കൊണ്ടോ എന്നറിയില്ല എനിയ്ക്കങ്ങനെ കസ്റ്റഡിയില്‍ ഒന്നും വന്ന് പെട്ടിരുന്നില്ല)
അങ്ങനെ എന്റെ സ്പെസിഫിക്കേഷന്‍സിന്റെ കൂടെ ജാതകവും കൂടി ആയപ്പോള്‍ എല്ലാം കൂടി തികഞ്ഞ ഒരെണ്ണത്തെ കിട്ടാന്‍ അമ്മ കുറേക്കാലം അലഞ്ഞു. അമ്മ സ്ഥിരമായി സന്ദര്‍ശിയ്ക്കുന്ന ആ ജ്യോല്‍സ്യന്‍ തിരുമേനി മേല്‍ക്കുമേല്‍ അഭിവൃദ്ധിപ്പെട്ടു.
ഹിന്ദുമതസ്തരല്ലാത്തവരും മറ്റും കല്ല്യാണം കഴിയ്ക്കുന്നത്‌ എന്ത്‌ ജാതകം നോക്കിയിട്ടാണെന്ന ചോദ്യത്തില്‍ നിന്ന് മാതാശ്രീ ഒരു ജാള്യതയും കൂടാതെ ഒഴിഞ്ഞുമാറിയിരുന്നു.
പലപ്പോഴുന്‍ ഞാന്‍ ശ്രദ്ധിച്ച മറ്റൊരു വിഷയം എന്തെന്നാല്‍ ജാതകപ്പൊരുത്തക്കേടില്‍ നിന്നുണ്ടായ പ്രശ്നങ്ങളെ പ്രൊജക്റ്റ്‌ ചെയ്യുന്നതില്‍ ജാതക വിശ്വാസികള്‍ പ്രഗല്‍ഭരാണെന്നതാണ്‌. പക്ഷെ, ജാതകപ്പൊരുത്തം കേമമായിട്ടും ദുരന്തങ്ങള്‍ സംഭവിച്ച പല ഉദാഹരണങ്ങളും നേരില്‍ കണ്ടും കേട്ടും ബോദ്ധ്യപ്പെട്ടാലും വിശ്വാസികള്‍ക്ക്‌ ഒരു കുലുക്കവും സംഭവിച്ചില്ല.
ചെറുപ്പം മുതല്‍ ഞാന്‍ അറിയുന്ന നാട്ടിലെ ഒരു കുടുംബത്തിലെ ഒരു പെണ്‍കുട്ടിയുടെ വിവാഹം നടന്നു. പയ്യന്‍ നല്ല സ്മാര്‍ട്ട്‌ ആയ ഒരു ഗള്‍ഫ്‌ കാരന്‍. എല്ലാവിധ ജാതകച്ചേര്‍ച്ചകളും സമയവും എല്ലാം നോക്കി ഭംഗിയായി നടത്തിയ വിവാഹം.
വിവാഹം കഴിഞ്ഞ്‌ ഒരു കൊല്ലത്തിനകം ആ ചെറുപ്പം മനുഷ്യന്‍ ഹാര്‍ട്ട്‌ അറ്റാക്ക്‌ വന്ന് മരിച്ച വാര്‍ത്ത നാട്ടുകാരെ എന്ന പോലെ എന്നെയും വേദനിപ്പിച്ചു.
ജോല്‍സ്യത്തെയും ജ്യോല്‍സ്യനെയും നേരെ കൈ തരിച്ച ആദ്യ സംഭവം അതായിരുന്നു.
(ഉദാഹരണ സംഭവങ്ങള്‍ തുടരും...)
Subscribe to:
Post Comments (Atom)
4 comments:
സ്വന്തമായി തോന്നിയ കുറേ വിചാരങ്ങളെ ഒരിടത്ത്‌ രേഖപ്പെടുത്തണമെന്ന ഉദ്ദേശത്തോടെ ഒരു പുതിയ ബ്ലോഗ്‌ തുടങ്ങി...
ജ്യോതിഷവും കൈത്തരിപ്പും എന്ന വിഷയം ആദ്യം...
സൂര്യോദയമേ തുടരൂ...
കല്യാണം കഴിഞ്ഞു, ഇനീപ്പൊ എന്തും പറയാല്ലോ :-)
sooryodayam enanthu serikkulla name ano?
Post a Comment